October 20, 2017

សង្គម​ក្រៅរដ្ឋាភិបាល​ស្នើ​ឲ្យ​ដក​អាជ្ញាប័ណ្ណ​ក្រុមហ៊ុន​យួន​ក្រោយ​រក​ឃើញ​បទល្មើស​ព្រៃឈើ

ឈើ​ដែល​អាវុធហត្ថ​ខែត្រ​ក្រចេះ​ចាប់​បាន​នៅ​ស្រុក​ស្នូល ខែត្រ​ក្រចេះ ឋិត​ក្នុង​បរិវេណ​ដី​សម្បទាន​សេដ្ឋកិច្ច​វៀតណាម កាល​ពី​ថ្ងៃទី១៨ ខែ​តុលា ឆ្នាំ​២០១៧។ Photo Provided

ដោយ អាស៊ីសេរី RFA 2017-10-20

មន្ត្រី​សង្គម​ស៊ីវិល ជំរុញ​ឲ្យ​រដ្ឋាភិបាល ដក​អាជ្ញាប័ណ្ណ​ពី​ក្រុមហ៊ុន​វៀតណាម និង​អនុវត្ត​ច្បាប់​លើ​ក្រុមហ៊ុន​នេះ បើ​រក​ឃើញ​ថា មាន​ភាព​មិន​ប្រក្រតី​នៃ​អាជីវកម្ម​ឈើ​ខុសច្បាប់ ឆ្លងដែន​ទៅ​ប្រទេស​វៀតណាម។ ការ​លើក​ឡើង​នេះ ក្រោយ​ពី​មន្ត្រី​អាវុធហត្ថ​ខែត្រ​ក្រចេះ ឃាត់ខ្លួន​ជនជាតិ​វៀតណាម ៦​នាក់ និង​រឹបអូស​ឈើ​ហ៊ុប​មូល​ជាច្រើន​ម៉ែត្រគូប ឋិត​ក្នុង​បរិវេណ​ក្រុមហ៊ុន​សម្បទាន​សេដ្ឋកិច្ច​របស់​វៀត​ណា​ម មាន​ទីតាំង​ក្នុងស្រុក​ស្នួល។

មន្ត្រី​ឃ្លាំមើល​សមាគម​អាដហុក (Adhoc) ខែត្រ​ក្រចេះ​សង្ស័យ​ថា ឈើ​ដែល​មន្ត្រី​អាវុធហត្ថ​ចាប់ និង​ឃាត់ខ្លួន​ជនជាតិ​វៀតណាម ៦​នាក់ កាលពី​ថ្ងៃទី១៨ តុលា អាច​ជា​ឈើ​ដែល​គេ​បន្លំ​ចូល ក្នុង​ក្រុមហ៊ុន​សម្បទាន​សេដ្ឋកិច្ច​របស់​វៀតណាម​ឈ្មោះ អ៊ី.អ៊ិនវេសមេន (E-Investment Co.Ltd ) ដើម្បី​បម្លែង​ជា​ឈើ​ស្របច្បាប់​រួច​ដឹក​ទៅ​ប្រទេស​វៀតណាម។

មន្ត្រី​ឃ្លាំមើល​បញ្ហា​ព្រៃឈើ នៃ​សមាគម​អាដហុក ខែត្រ​ក្រចេះ លោក ប៊ី វ៉ាន់នី គាំទ្រ​ចំពោះ​ចំណាត់​ការ​របស់​អាវុធហត្ថ​ខែត្រ​ក្រចេះ តែ​លោក​ចង់​ឲ្យ​ក្រុមហ៊ុន​នេះ ទទួលខុសត្រូវ​ចំពោះ​មុខ​ច្បាប់ បើ​រក​ឃើញ​ពី​ភាព​មិន​ប្រក្រតី​នៃ​អាជីវកម្ម​ឈើ​ឆ្លងដែន​ខុសច្បាប់។ លោក​រក​ឃើញ​ថា បច្ចុប្បន្ន​ឈើ​ឋិត​ក្នុង​បរិវេណ​ក្រុមហ៊ុន​វៀតណាម​នោះ ពុំ​មាន​ឈើ​ហ៊ុប​មូល​ធំៗ​នោះ​ទេ ហើយ​ឈើ​ធំៗ​ត្រូវ​ក្រុមហ៊ុន​កាប់ និង​ឈូស​ឆាយ អស់​ច្រើន​ឆ្នាំ​មក​ហើយ ហេតុនេះ​ឈើ​ហ៊ុប​មូល ដែល​អាវុធហត្ថ​ចាប់​បាន​នោះ​ទំនង​ជា​ឈើ ដែល​គេ​បន្លំ​ចូល​ក្រុមហ៊ុន រួច​ដឹក​ឆ្លងដែន​នៅ​ប្រទេស​វៀតណាម។
លោក​កត់​សម្គាល់​ថា ក្រុមហ៊ុន​សម្បទាន​សេដ្ឋកិច្ច​មួយ​ចំនួន​នៅ​ខែត្រ​ក្រចេះ ធ្លាប់​បាន​ផ្តល់​ទីតាំង​ឲ្យ​ឈ្មួញ​បន្លំ​ឈើ​ចូល​ក្រុមហ៊ុន​របស់​ខ្លួន ដើម្បី​បម្លែង​ជា​ឈើ​ស្របច្បាប់ រួច​ដឹក​ចេញ​ក្រៅ​ដូចជា ក្រុមហ៊ុន​សម្បទាន​សេដ្ឋកិច្ច ឆាយណា ដាយណាមិច (CHINA DYNAMIC INVESTMENT C0., LTD.) ជាដើម ដែល​ទ​ទូល​បាន​អាជ្ញាប័ណ្ណ​ពី​រដ្ឋាភិបាល ពុំ​សូវ​វិនិយោគ​អ្វី​ក្រៅពី​កាប់​ឈើ​ធ្វើ​អាជីវកម្ម​នោះ​ទេ។

កាលពី​ថ្ងៃ​ទី​១៨ តុលា អាវុធហត្ថ​ខែត្រ​ក្រចេះ ឃាត់​ត្រាក់ទ័រ ៤គ្រឿង រ៉ឺម៉ក​ផ្ទុក​ឈើ​មូល ៣​គ្រឿង រថយន្ត​ប៉ា​កុង ២​គ្រឿង អាប៊ុល​ចំនួន ៤​គ្រឿង និង​ឈើ​មូល ១០០​កំណាត់ មាន​មុខ​កាត់ ៤​តឹក និង​បណ្ដោយ ១០​ម៉ែត្រ ព្រមទាំង​ឃាត់​ខ្លួន ជនជាតិ​វៀតណាម​សរុប​ចំនួន ៦​នាក់ ដោយ​បាន​បញ្ជូន​ទៅ​ទីបញ្ជាការ​កងរាជអាវុធហត្ថ​ខែត្រ​ក្រចេះ ដើម្បី​អនុវត្ត​ច្បាប់។

អភិបាលស្រុក​ស្នូល​លោក គង់ គឹមនី បដិសេធ​មិន​អធិប្បាយ​រឿង​នេះ​ទេ​នៅ​ថ្ងៃ​ទី២០ តុលា តែ​លោក​ប្រាប់​កាសែត​ភ្នំពេញ​ប៉ុស្តិ៍​ថា ទីតាំង​ដែល​ចុះ​បង្ក្រាប​នោះ ពុំ​មែន​ជា​ដី​ព្រៃ​អភិរក្ស ឬ​ព្រៃ​បម្រុង​ទុក​នោះ​ទេ គឺជា​ដី​ក្រុមហ៊ុន​ដែល​ទទួល​បាន​ពី​រដ្ឋាភិបាល និង​មាន​ច្បាប់​សម្រាប់​ឈូស​ឆាយ។

មេឃុំ​ពីរ​ធ្នូ លោក ពឹង វិន បញ្ជាក់​យ៉ាង​ខ្លី​ថា ឈើ​ដែល​អាវុធហត្ថ​ចាប់​នោះ គឺជា​ឈើ​ឋិត​ក្នុង​បរិវេណ​របស់​ក្រុមហ៊ុន​ដែល​ទទួល​សិទ្ធិ​វិនិយោគ​ពី​រដ្ឋាភិបាល ខណៈ​តំបន់​នោះ​ពុំ​មាន​ផ្លូវ​សម្រាប់​ដឹកជញ្ជូន​ឈើ​ចូល​នោះ​ទេ។

តែ​យ៉ាងណា មន្ត្រី​សង្គម​ស៊ីវិល​អះអាង​ថា បើ​ទោះ​បី​ជា ឈើ​ដែល​អាវុធ​ហត្ថ​ចាប់​នោះ​ឋិត​ក្នុង​បរិវេណ​របស់​ក្រុមហ៊ុន​ក្ដី តែ​ការ​ធ្វើ​អាជីវកម្ម​ឈើ​ឆ្លងដែន​ទៅ​វៀតណាម​គឺជា​ករណី​ខុសច្បាប់ ខណៈ​ដែល​រដ្ឋាភិបាល​ធ្លាប់​ប្រកាស​បិទ​ច្រក​នាំចេញ​ឈើ​ទៅ​ក្រៅ​ប្រទេស។

កាលពី​ឆ្នាំ ២០១៦ អំឡុង​ពេល​ដែល​រដ្ឋាភិបាល​បង្កើត​គណៈកម្មការ​ជាតិ​ទប់ស្កាត់ និង​បង្ក្រាប​បទល្មើស​ព្រៃឈើ ដែល​ដឹកនាំ​ដោយ​មេបញ្ជាការ​កងរាជអាវុធហត្ថ លោក សៅ សុខា បាន​បង្ក្រាប​ទីតាំង​ផ្ទុក​ឈើ​មួយ​កន្លែង​របស់​ក្រុមហ៊ុន​សម្បទាន​សេដ្ឋកិច្ច​ចិន ឈ្មោះ ឆាយណា ដាយណាមិច ជាដើម ដោយ​រឹបអូស​ឈើ​ហ៊ុប​ជាង ៣​ពាន់​ម៉ែត្រ​គូប ជា​ប្រភេទ​ឈើ​គគីរ និង​សុក្រំ មាន​មុខ​កាត់​ចាប់ពី ៤​តឹក​ឡើង​ទៅ​ប្រវែង ៥​ម៉ែត្រ​ដល់ ជាង​១០​ម៉ែត្រ ដែល​ឈ្មួញ​ដឹក​ពី​តំបន់​ព្រៃ​អភិរក្ស​ខែត្រ​មណ្ឌលគិរី។ សំណុំ​រឿង​នេះ អាវុធហត្ថ​បាន​បញ្ជូន​ទៅ​សាលាដំបូង​ខែត្រ​ក្រចេះ ដែល​គេ​រក​ឃើញ​ថា​ជាប់​ពាក់ព័ន្ធ​ឧកញ៉ា​មួយ​ចំនួន ជាមួយ​ក្រុមហ៊ុន​សម្បទាន​សេដ្ឋកិច្ច​ចិន ក៏ប៉ុន្តែ​មក​ទល់​ពេល​នេះ​សំណុំ​រឿង​នេះ​ហាក់​ស្ងាត់​នៅឡើយ៕

1 comment:

Anonymous Anonymous said...

Well...As you know the Cambodian forest is to feed the billion dollars Vietnam wood products industry for the past 30 years which help support and create more employment for Vietnamese workers in Vietnam. The Vietcong government get these Cambodian trees almost for free!

If these Vietnamese nationals can cut down Cambodian trees without the fear of Cambodian laws and this means these Vietnamese national can behead AH kook Hun Cent Vietcong slave dictator's head too without the fear of Cambodian law!

AH kOOK Hun Cent Vietcong slave dictator is truly the Vietcong bitch after all!